5-28 may tarixlərində Xırdalan və Astara şəhərlərində yerləşən AAAF Park Yaşayış, İdman, İstirahət və Əyləncə Komplekslərində keçirilən Ümummilli lider Heydər Əliyevin anadan olmasının 96-cı ildönümünə həsr olunmuş 7-ci “Zirvə Beynəlxalq Uşaq Oyunları” davam edir. 27 idman növündə 12 ölkədən olan 4 mindən çox idmançı uşağın qüvvəsini sınayacağı yarışlarda növbə çimərlik voleybolçularına çatıb.
Astara şəhərində yerləşən AAAF Parkın ərazisindəki çimərlikdə qurulan xüsusi çimərlik voleybolu meydançası Avropa və dünya səviyyəli müvafiq yarışların keçirilməsi üçün bütün standartlara uyğunlaşlaşdırılmışdı. Paytaxt və regionları təmsil edən 9-u qız, 10-u oğlan olmaqla ümumi 19 komanda Oyunların qalibi olmaq üçün mübarizə apardı. Yeniyetmə voleybolçular iki gün ərzində gözəl oyun nümayiş etdirdilər, əyləncəli vaxt keçirərək əsl böyük turnir təcrübəsi yaşadılar. Yarışları izləyənlər arasında çoxsaylı yüksək çinli qonaqlar – voleybol veteranları, Gənclər və İdman Nazirliyi və müxtəlif klubların nümayəndələri, həmçinin Astara şəhəri İcra Hakimiyyətinin başçısı Qəzənfər Ağayev də vardı. Bu voleybol bayramını izləmək hər kəs üçün böyük zövq idi.
Qızların yarışında finalda “Zirvə” təmsilçiləri üz-üzə gəldilər. “Zirvə 2” komandası hər iki setdə “Zirvə 1” üzərində qələbə qazanaraq qızıl medallara sahib çıxdı. Bürünc medal isə “Xətai 1”i 2:0 hesabı ilə məğlub edən “Azərreyl 2” komandasına qismət oldu.
Oğlanlarda isə finalda ən güclü tərəf “Neftçi 1” oldu. “Masallı-Zirvə” komandasına qalib gələn “ağ-qaralar” fəxri kürsünün ən yüksək pilləsinə qalxdılar. Bürünc medalı isə “Zirvə 2”-ni məğlub edən “Neftçi 2” komandası boynundan asdı.
Mükafatçılara medal, diplom və xatirə hədiyyələri təqdim olundu. Bununla yanaşı, qızlarda yarışların ən kiçik iştirakçısı və “Azarkeşlərin simpatiyası” nominasiyasının qalibinə xatirə hədiyyələri də verildi.
“Zirvə” Beynəlxalq İdman Klublarının təşkilatçılığı ilə keçirilən bu Oyunları böyük ənənə halını almaqdadır. “Zirvə Oyunları”nın keçirilməsində məqsəd dahi liderin irsinin yaşadılması, onun ölkəmiz üçün etdiyi işlərin gələcək nəsillərə çatdırılması, eyni zamanda, idman növlərinin yerlərdə təbliği və inkişafı, idmançılar və məşqçilər arasında dostluq əlaqələrinin möhkəmləndirilməsi, idmançıların ustalıq səviyyəsinin artırılması və təkmilləşdirilməsi, yarış vərdişlərinin mükəmməlləşdirilməsi, məşqçi-müəllimlərin işlərinin qiymətləndirilməsidir.
“Zirvə Oyunları”nda idmançılar ağır atletika, atçılıq, atıcılıq, basketbol, boks, cüdo, futbol və çimərlik futbolu, bədii və idman gimnastikası, güləş (sərbəst, yunan-roma), karate, kartinq, kikboksinq, qılıncoynatma, kamandan oxatma, pauerliftinq, şahmat, taekvondo, tennis və stolüstü tennis, üzgüçülük, çimərlik voleybolu və voleybol, badminton, atletika növlərində medal mübarizəsinə qoşulacaqlar.
The requested album cannot be loaded at this time. Error: OAuthException Code: 200, (#200) Missing Permissions
