Avqustun 03-10-u tarixlərində İtaliyanın Turin şəhərində Veteran idmançılar arasında keçirilən VIII Ümumdünya Oyunları başa çatıb. Milli komandamızın üzvlərindən daha bir neçəsi son yarış günlərində körpücük üzərinə çıxıb.
Belə ki, kişilər arasında 40-45 yaş qrupu üzrə 77 kq çəki dərəcəsində Namiq Ağayev mübarizə aparıb. Atletimiz 201 kq (91+110) nəticə ilə 8-ci yeri tutub .
Eyni yaş qrupunda 85 kq çəki dərəcəsində Teymur Əliquliyev 212 kq (92+120) nəticə ilə 6-cı pillədə qərarlaşıb.
Bu yaş qrupunda daha bir idmançımız – İltifat Məmmədov 105 kq çəki dərəcəsində mübarizə aparıb. O, 215 kq (95+120) ilə 7-ci yeri tutub.
35-40 yaş qrupunda isə millimizin şərəfini Asif Məlikov qoruyub. O, 77 kq çəki dərəcəsində yarışıb. Ancaq birdən qaldırmada sıfır nəticə göstərərək yarışları uğursuz bitirib.
Ən böyük uğuru isə 30-35 yaş qrupunda əldə etdik. Əvvəlcə 77 kq çəki dərəcəsində Aftandil Hümbətli medal qazandı. O, 239 kq (102+137) nəticə göstərdi. B u nəticə ilə o, Oyunların bürünc medalçısı oldu.
Bu yaş qrupunda 105 kq çəki dərəcəsində isə Natiq Həsənov daha möhtəşəm çıxış edib. O, 297 kq (135+162) çəkini başı üzərinə qaldıraraq hamıdan üstün olduğunu sübut edib.
Qızıl medal qazanaraq fəxri kürsünün ən yüksək pilləsinə qalxan atletimizi təbrik edir, ona uğurlarının davamlı olmasını arzulayırıq.
Eyni yaş qrupunda +105 kq çəki dərəcəsində Emil Əliyev təkanla qaldırmada sıfır alaraq, yarışı nməticəsiz başa vurub.
